Արարատի մարզի Դաշտավան գյուղում տեղի է ունեցել միջադեպ, որին մասնակից մի խումբ անձինք միմյանց հարվածել են քարերով, մահակներով և կռփազենքով:

ՀՀ ՆԳՆ հանրային հաղորդակցության և իրազեկման վարչությունը պարզաբանում է տարածել լրատվամիջոցներում շրջանառվող լուրերի վերաբերյալ:
Ըստ նախնական տվյալների՝ օգոստոսի 9-ին՝ ժամը 00:40-ի սահմաններում, ՆԳՆ օպերատիվ կառավարման կենտրոն ահազանգ է ստացվել Դաշտավան գյուղի եկեղեցու մոտ բռնկված վիճաբանության մասին, որն այնուհետև վերածվել է ծեծկռտուքի:
Ոստիկանությունից հերքում են մամուլում տարածված տեղեկությունները, թե միջադեպի ընթացքում կրակոցներ են հնչել և կան հրազենային վիրավորներ:
Ձեռնարկված օպերատիվ-հետախուզական միջոցառումների արդյունքում խուլիգանություն կատարելու կասկածանքով մի քանի մասնակիցներ ձերբակալվել և տեղափոխվել են Համայնքային ոստիկանության Մասիսի բաժին: Դեպքի առթիվ նախաձեռնվել է քրեական վարույթ, հանգամանքները պարզվում են: