Սիսիանն ու Լահիջանը կդառնան քույր քաղաքներ․«Նավասարդ» հայ-իրանական մշակութային և խոհարարական փառատոնը նշում է իր 5-ամյակը

Օգոստոսի 10-ին և 11-ին Սյունիքի մարզի Սիսիան քաղաքում կանցկացվի հայ-իրանական «Նավասարդ» հոբելյանական՝ 5-րդ մշակութային-խոհարարական փառատոնը։ Այն կհամախմբի Հայաստանի և Իրանի մշակույթի, խոհանոցի, երաժշտության ու զբոսաշրջության ոլորտների ներկայացուցիչներին։

Միջոցառմանն ընդառաջ հրավիրված ասուլիսի ընթացքում ծրագրի առանձնահատկություններն ու նորությունները ներկայացրել են Հայաստանում Իրանի փոխդեսպան Բահրամ Թահերին, Հայ խոհարարական ավանդույթների զարգացման և պահպանման ՀԿ նախագահ Սեդրակ Մամուլյանը և Տուրիզմի հայկական ֆեդերացիայի նախագահ Մեխակ Ապրեսյանը։

Երկօրյա ծրագիր և քույր քաղաքների համաձայնագիր

Տուրիզմի հայկական ֆեդերացիայի նախագահ Մեխակ Ապրեսյանի խոսքով՝ այս տարվա գլխավոր նորությունն այն է, որ փառատոնն առաջին անգամ կտևի երկու օր։

• Օգոստոսի 10 (ժամը 16:00)․ Փառատոնի պաշտոնական մեկնարկ։

• Քույր քաղաքների հուշագիր․ Բացումից անմիջապես հետո գլխավոր բեմում Սիսիանն ու Իրանի Գիլան նահանգի Լահիջան քաղաքը պաշտոնապես կհռչակվեն քույր քաղաքներ։

• Մշակութային ծրագիր․ Ստորագրման արարողությանը կհաջորդի համերգային ծրագիր՝ իրանցի երաժիշտների, Սիսիանի ժողովրդական գործիքների անսամբլի և հայ-իրանական այլ խմբերի մասնակցությամբ։

• Օգոստոսի 11․ Ավանդույթի համաձայն՝ մասնակիցները առավոտյան կայցելեն Քարահունջ, որից հետո միջոցառումը կշարունակվի Սիսիանում՝ ցուցատաղավարների գործունեությամբ և երեկոյան մշակութային ծրագրով։

Խոհարարական դիվանագիտություն և «Խաղաղության գավաթ»

Հայ խոհարարական ավանդույթների զարգացման և պահպանման ՀԿ նախագահ Սեդրակ Մամուլյանն ընդգծել է, որ «Նավասարդը» դուրս է եկել սովորական միջոցառման շրջանակներից և միավորում է սննդի մշակույթը, արվեստը, խաղերն ու ծիսական համակարգը։

• 43 տաղավար Իրանից․ Այս տարի Իրանի Իսլամական Հանրապետությունն ներկայացված է լինելու ռեկորդային թվով տաղավարներով։

• «Խաղաղության գավաթ»․ Մրցույթի նպատակն է Հայաստանը դիրքավորել որպես միջազգային խոհարարական առաջնությունների կենտրոն՝ հնարավորություն տալով տարբեր երկրների խոհարարներին փորձի փոխանակում իրականացնել և հանրահռչակել Սիսիանը։

Մշակութային կամուրջ երկու ժողովուրդների միջև

Հայաստանում Իրանի փոխդեսպան Բահրամ Թահերին նշել է, որ հայ և իրանցի ժողովուրդների դարավոր պատմամշակութային կապերն ու ընդհանուր քաղաքակրթական միջավայրը լավագույնս արտահայտվում են հենց նման նախաձեռնություններով։ Նրա գնահատմամբ՝ «Նավասարդ» փառատոնը դարձել է մշակութային դիվանագիտության արդյունավետ հարթակ և երկու երկրների միջև հուսալի կամուրջ։